الصحبي صمارة يسخر من النخبة السياسيّة

أكد النائب بالبرلمان المجمّد الصحبي صمارة أن قيس سعيّد استغلّ فشل النخبة السياسيّة ليصنع لنفسه نجاحات وهميّة مضيفا أنه نجح في اقصاء كافة الطبقة السياسيّة المسيطرة على المشهد السياسي منذ الثورة.

وأضاف صمارة أن قيس سعيّد ألغى منح وامتيازات النواب وهو ما سيسبّب له خسائر فادحة بعد بيع سيّارته وأخذ قرض بنكي للقيام بحملته الانتخابية .

وفي ما يلي مة كتبه النائب:

برجولية عجبني ما يردهاش لتالي:
جاوه الأمريكان وقلهم لا
جاوه الاتحاد الاوروبي وقال لا
كلموه العرب وحسب روحه ما فيبالوش
كلمه الطبّوبي وطفّاه
مجيد الزّار توضّى وصلى ركعتين وطلبوا طفّاه
بن جعفر خرج ينڨّز من بيت البانو يساند فيه وزرفلو شوي مقترحات ياخي عملوا فضيحة.
نجيب الشابي قريب يرجع يُخطب في الجامعة وهو ما على بالو بيه.
فاضل عبد الكافي نحّى الفرملة وقريب ينحّي حوايج أخرى ما خزرلوش أصل.
الصادق شعبان يعكّز وينظّر هو الزكراوي وشيء باعثهم هما وقرايتهم أكالصعيية.
عرضت عليه الزغراطة القطاطس متاعها يصحّحوا على حلّ البرلمان وحقرها هي وقطاطسها.
سامية عبّو بعد ما ضربت عام من تطييح حكومة الزبّال بو 44 مليار وهي تنظّر للفصل 80 وبعد ما كانت ماشية جاية على قرطاج تو ولاّت تقول عليه جبان كيف طفّاها هي والنواب اللي كيفها.
هيكل المكّي نهار الكلّ يمكيج وناقص يلبس روبة وطفّاه وطبعا هيكل ماهو كان محامي القروي بمقابل وعنده شهرين ولّى محامي الفصل 80 على وجه الفضل ورغم تضحياته الجسيمة حاقرو.
الشيخ اللي هو الدّماغ اللي مستعرف بيه طلب طلب طلب طلب، شيء النافع ربّي ما يجاوبوش.
محمد عبّو صاحبي المسكين رجعت عليه الكورة رصاتلو في الجزيرة مصبّح يلوج على جبهة لحماية الدستور والفصل بين السلط.
محمد القوماني قريب يكري ستوديو بالاشتراك مع نوفل سعيد وهو ينظّر للاستيعاب الديمقراطي ياخي طفّاهم الزوز كيف القوماني كيف خوه ههههههه.
وسائل الإعلام مقطّعة عروقها وبلاتوات ترهدين ونفاق وحقرهم.
سيف خويا وصاحبي الله غالب حاطّه في راسو وعدّاه،
ياسين والحمد لله على سلامته كتب فيه هجائية ياخي منڨلو ودورو.
آنا ماشي متسلف وعامل حملة انتخابية وماخذ قرض ونميل في راسي ونساند فيه ونجيب في المراقبين للدور الثاني متاع الرئاسية وندافع عليه في التلافز وهو والله لا عبّرني أصل.
الصافي كاتب سبعين مُجلّد وهز سبعين رأس صحاح مصحّحين على عريضة طويلة وعريضة على خاطر من جاء وهنّى ياخي رصتلو مقيّل في الڨريطة.
يوسف الشاهد قريب يشدّ المصلحة ويسيّق القصر وطفّاه.
سمير ماجول زاد في سوم الإسكالوب وشيء قالو ما ناكلوش.
زهير المغزاوي قريب يبعثلو برميل امّالح ما عبّروش.
حسونة الناصفي حسب روحه متوفّي خلاّه لين ينتن على بلاصته بعد ما كان يصول ويجول في المجلس.
مشتلوا الناس للمسرح خلاهم ومشى لبوزيد.
كتبوا عرائض تنديد موش هوني
عملوا جبهات موش هوني
جمّدنا شهرين وتو زادنا شوي ثلج وقصّ علينا الشهرية وموش هوني
نحّى شطر الدستور وخلّى فيه شطير متاع ماخذة الخاطر باش اللي ياكل طريحة يلقى ما يبقبق وهو موش هوني،
برجولية عجبني ما يردهاش لتالي 💪
اتخيلو بلاد جاتها الديمقراطية ووقف معاها العالم أجمع وهي عشرة سنين اللي حكموها لا نهار زادوا فيها حاجة للزوالي ولا نهار خمّموا ( يخمموا موش يفكروا) في إنقاذ الصغيرات اللي كل عام يبطّلوا القراية منهم قرابة 50 ألف ويحرقوا قرابة 50 ألف حتى لين عائلات كاملة ولّت تحرق وشطرها يغرق.. ديمقراطية رأس لمبوط هذه اللي عبثت بالبلاد والعباد حتى لين رئيس حكومة يمشي يسكر ويشلّل في عينيه وخلق ربّي مطيشين موتى في الكياس بكورونا..
عجبني برجولية موش الذكاء والقدرة على توظيف فشل النخب السياسية على بڨرة أبيها باش يحقق هو نجاحات وهمية، لا موش هذا 😞 إنما عجبني كيفاش متملّح من هالنُّخب المعفطة اللي سنوات ربّي داخل الدولة وعندها دستور وقوانين وميزانيات ودعم خارجي وقروض وهمّ أزرڨ رافضة تجتمع على برنامج صغيّر في عشرة صفحات باش يحلّوا مشاكل بلادهم، هيا تو برّوا اجتمعوا تحت الحيط، هاني جايكم نهار الأحد وما تعملوناش كيف قبل الكورطاج من قدام للزعماء والبوليسية يدورو من تالي يضربوا الشباب بالڨاز وانتم فر فر لكراهبكم، آنا الكرهبة راني بعتها باش نخلص ديوني.
شعب كامل بعثنا نشيطوا ورصّاتلنا نلوجوا على عزّام يحلّنا خرّافة الشرعية والمشروعيّة وهو موش هنا..
يا سلاّك الواحلين
لا غسّالة النوادر ولا الحكومة
برلمان مجمّد وبلا شهرية مشومة
والدستور الجديد يكتبوا فيه أولاد الحومة
هذه ديمقراطية كيف لحمة الكرومة متّاكلة مذمومة
سيدي الرئيس سامحني فيك كان بن علي ولد ربطيتي قال غلطوني طاح فما بالك إنت غلّطنا الكلّ..
يسقط الانقلاب
لا للحكم الفرديّ لا للاستبداد