الاعتداء على طبيب ومحاولة دهس آخر بمستشفى الياسمينات : إيقاف المعتدي و تفاصيل الإجراءات المتخذة

كشف مصدر أمني مطلع أن الوحدات الأمنية تمكنت من القبض على مواطن اعتدى بالعنف الشديد على طبيب يعمل بقسم كوفيد-19 بمستشفى الياسمينات ببن عروس وأن النيابة العمومية أذنت بايقاف المعتدي على الفور.

و أكّد الدكتور ، منصف الهواني، المدير الجهوي للصحة ببن عروس ، الخميس 22 جويلية 2021، أن طبيبين بقسم الاستعجالي بالمستشفى الجهوي بالياسمينات، قد تعرّضا أمس إلى الاعتداء بالعنف المادي واللفظي من قبل مواطنين وذلك بعد وفاة قريبتهم بالمستشفى.
وأضاف الهواني، أن والد المعتدي أراد تهريبه بعد الحادثة وأثناء ذلك قام بمحاولة دهس طبيب آخر، مؤكّدا أنه تم فتح تحقيق في الحادثة ورفع قضية في العرض وكذلك إيقاف المعتدي.

وأشار إلى انه تم عقد اجتماع بإدارة المستشفى، وذلك بإشراف والي الجهة، وتم اتخاذ إجراءات صارمة بخصوص قبول المرضى والمرافقين لهم وأيضا اتخاذ إجراءات أمنية مشددة بالمستشفى.

21 جويلية 2021
المكان : استعجالي المستشفى الجهوي ببن عروس
انا الطبيب المقيم المناوب بوحدة الكوفيد بالإستعجالي
زميلي ، دكتور عيسى دراجي ، الطبيب المناوب ب الوحدة المتنقلة للاسعاف الطبي الإستهجالي (smur ben arous)
مع الساعة 15h , يجيبو مريضة للاستعجالي فاقدة للوعي ، اتضح كونها على حالة وفاة (dépot de corps)
المريضة دخلوها ديراكت لقاعة استقبال الحالات الإستعجالية (SAUV) يعني لا ريتها لا عديت علاها لا نعرفها لا نعرف اهلها (بحكم نخدم في وحدة الكوفيد ، لي بنيتها منفصلة ع الاستعجالي )
تدخل العايلة متاعها في حالة هستيريا و يكسرو البلور في في القاعة هذيكة (الي وراه راقدين مرضى )
في اللحظة هذي يكلموني بش نوصل لزميلتي لي تخدم في الإستعجالي لداخل معلومة على مريض بحكم ما تحصلوش علاها ، و هو ما حصل .
على خرجتي م القسم (راجع لوحدة الكوفيد) يتم التهجم علي لفضيا و جسديا من طرف واحد من عايلة المتوفاة ( الي لا نعرفها لا نعرفو) خاطر شاف طبيب متعدي و الطبة لكل خايبين و قتالة ارواح في اللحظة هذيكا … و الفيديو يبين كل شيء مش لازم نحكي علي صار ، فقط جات بغدرة ، من شخص ما عندي بيه حتى صلة ، و الضرر النفسي ثاني و مثلث …
يوصلو يمرمدوك بالطريقة هذيكا و يقولولك عندو الحق امو متوفية ماهي الا ردة فعل
يجيو يهربو في المعتدي بكرهبة ، يضربو صديقي د. دراجي بالكرهبة في محاولة دهس ، يكمل يخرج السيد م الكرهبة و يهز حاجز يحب يضربنا بيه …
بعد لا كلينا ع ريوسنا بش جات الشرطة و شداتو …
المرة هذي جات بالضرب ، شكون قال المرة الجاية مش بالسكاكن ؟ الى متى ؟ وحدة الكوفيد ببن عروس تخدم ب 300% من طاقتها ، و حاملين ، نخدمو خدمة طبيب و ouvrier و sécurité وساكتين …
الى متى ؟ ناكل طريحة على مريض توفى اصلا ما عنديش بيه علاقة ؟
لي صارلي اليوم صار لبرشا عباد ، و مزال بش يصير كان نقعدو قابلين بالذل هذا … زعام كان في تقشقيش الحناك و يمجدو في عمل الجيش الأبيض و هوما ابسط متطلبات الخدمة ، الأمن ، مش موفرينو …
نهار السبت لي تعدى ديجا كسرولنا وحدة الكوفيد بالحجر على متوفي ، و كنت انا الطبيب المناوب كيف كيف ، حتى الوقتاش ؟ حتى في الحرب ما صارش هذا ! ع الأقل في الحرب مركز على عدوك اومورك واضحة ، عارف الضربة منين بش تجيك ، اما لا يزي تحارب الكوفيد زيد تقعد تعس تجيكش حجرة منا تجيكش بونية من غادي ، هذا level جديد …
وعلى الدنيا السلام …
#يزي_فلڨطنا
منقول عن الطبيب المقيم يوسف بن إبراهيم